靚太的幸福

1. 安全地帶 (comfort zone)

有啲人,永遠只會喺佢生活嘅範圍出入,視之為佢嘅comfort zone,一離開,就會覺得好彷徨。

「港島靚太」顧名思義,由佢出生、成長、讀書到工作,都在港島區爾邊。一離開金鐘站往尖沙咀方向,佢就會好似迷途羔羊咁,要搵個牧羊人黎引路。

話說有次,佢同朋友要去紅館睇show,問我果邊食飯有乜好提議? 我話: 「你地可以去太子新世紀果頭食飯,然後由旺角東站坐一個站去紅磡咪啱啱好囉。」

港島靚太聽完,問: 「由太子地鐵站可以坐的士去新世紀架可?」我聽到,心裡面即刻「啤」一聲,不過我恁樣答佢: 「由太子站可以行去新世紀,五至十分鐘左右架咋。你截的士,我怕個司機會 “jip” 你囉。」佢聽完,諗咗一陣,之後就同佢朋友傾電話,將我嘅提議話畀個朋友知。之後點樣? 我無再問喇。

又話說,我見親港島靚太,都係返工時候,佢永遠只係著one-piece 裙,一係就top 加半截長裙 (差不多到腳眼那種)。我曾經問佢點解唔著褲?佢個答案真係令我嘆為觀止! 「因為我腳短,買褲一定要改,咁我費事拎去改嘛,所以一直著裙囉。」後來,當然有一件驚天地、泣鬼神嘅事發生,令佢要改變呢個習慣。

2. 家家有本難唸的經

我性格其實係唔多中意理人地嘅事,除卻工事以外,與同事相處都係嘻嘻哈哈就算。不過,由於港島靚太同我工作上接觸比較密,所以有時都會聽佢講下佢屋企嘅事。其實佢經常提及嘅 「家人」,不外乎係佢先生、家姑,偶爾聽佢講下佢媽媽同妹妹。點解佢成日提佢家姑?因為佢嘅開場白永遠都係: 「今晚又要去奶奶度食飯喇。」我初初聽,重以為係九十年代某個洋酒廣告嘅對白添!

家姑與媳婦是永恆的對立角色,要搵和平相處的家姑與媳婦,真係比登天更難。港島靚太並不與家姑同住,但佢一星期要三次去家姑家晚飯。我初時不知,佢要幫忙做飯嗎? 「唔使,有工人,不過次次去食飯都一定有雞,而奶奶炒菜炒到好黃……」聽到爾度,我已經明白係咩一回事。至於點解要一星期三次去食飯,原因係佢先生係家中獨子,上有幾位姐姐,下有一個妹妹。我不明白為何一星期三晚不用煮晚飯、有人幫你煮飯洗碗也那麼難捱? 偶然,亦聽過佢話,有時家姑的飯餸不合胃口,佢會要求食煎蛋。

「愛屋及烏」是否很難? 我不知道,我只知道身為獨子,家姑當然非常緊張。

每次佢都抱怨家姑怎樣煩,不過,當佢家姑打電話畀佢,佢接電話時把聲就會變得好溫柔。

之前我諗徂好耐,點解佢會咁溫柔呢? 喺我地面前,佢比較率真。後來……我得到答案。知道之後,只能夠講,好多人都有好多面,面對唔同人嘅時候,就要戴不同嘅面具。

3. 一物治一物

話說港島靚太認識先生多年才結婚的,佢曾經講過,佢家姑最初都有問佢幾時生小孩,但佢好堅決恁拒絕,經過幾年,佢家姑已經唔敢再問佢。

就喺家姑唔再問之後一兩年,佢某日開始突然改變裝束,唔再著連身裙或長裙,而是H&M 的恤衫配legging,而且返工放工都會戴口罩。我地問佢點解戴口罩,佢話街上好多菌。到後來,我地估佢應該係有身孕,只係時間未到,佢唔能夠承認,怕小孩小器。

我唔知道靚太家姑一知道靚太懷孕的消息時的反應,但我肯定一定是喜出望外。

有人話: 懷孕時的女人是最美麗的,我不置可否。不過,港島靚太未有孕時都曾經被人誤會讓座,令我們笑了很久。而今佢真的懷孕,大家在日常生活就會遷就佢啦。

後來,靚太無等到「前四後六」就辭職了,連有薪分娩假也不要。當然啦,家公家姑住半山,佢當時買樓,首期係家姑畀架。畀我對住家姑都會「陰聲細氣」啦。

靚太生了個男孩,當然令佢在家姑心中加更多分數啦。不過,由小孩出生開始,就係為人母親失去自由的開始,至少在未來十幾廿年是如此。

有好多人身在福中不知福,不知何故仍要抱怨,言者可能無心, 但聽的人只會覺得煩厭。

最後送上謝安琪的 《你們的幸福》。

Advertisements

About Eternity of words HK

在抒情和抗爭之間遊走。 曾獲香港青年文學獎小說獎,作品散見於《香港文學 》、《秋螢詩刊》(復活號)、《詩++》及《聲韻詩刊》 等。 著有詩集《中女情懷總是詩》 及《抒情的抗爭》。
This entry was posted in 潮文 and tagged . Bookmark the permalink.

One Response to 靚太的幸福

  1. Pingback: 靚太的幸福 - dropBlog

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s