中環OL獨白之一 : 我是誰?

人生在世,令人最煩惱忌會係咩事? 當然係錢啦! 雖然話 『金錢係萬惡之根源』,但係,無錢就咩都唔使做,焉度都唔使去。要有錢當然要搵工啦,好不幸地,小妹開始工作時,完全錯失晒香港經濟起飛忌黃金時代,被香港同外圍經濟KO晒,畢業後幾年,經常要在人肉市場 (對唔住, 應該係求職市場) 打滾,時浮時沉……

我叫Kitty,係一個喺中環返寫字樓嘅OL,平時返工多數返八點半放六點,無錯,係返八半放六,今時今日,已經無咗朝九晚五呢支歌仔唱好耐喇。久唔久老細有事要幫手,都要OT夜收工噶,OT有無錢? 梗係無啦! 我第一份工果陣就有嘅,而今梗係無啦。

唔知好彩定唔好彩,我遇親尐公司,唔係摺埋就裁員,我大大話話都被人裁過三次,每次被揀中時,都會問: 「何必偏偏選中我?」好彩忌,如果做夠兩年以上,都有份遣散費捱住一陣先囉…… (但唔係次次恁好彩架嘛!) 跟住咪又要搵工。

就係恁,恁多年我好似一個遊牧民族恁,在不同的機構「遊走」。有尐老闆慨嘆尐打工仔坐唔定,成日想轉工;喂,你估我等想噶? 要有得畀我長做長有先得噶?

喺唔同年份走入求職市場,搵工的策略都需要隨之應變,如果唔係,真係挺 「揸兜」啦!

返中環好唔好 ? 睼你用焉方面去睼啦。好嘅就係一落街咩都有得賣,有超市、便利店、護膚或個人護理用品、絲襪、返工衫或者返工鞋恁啦。唔好嘅就係食晏非常昂貴,閑閑地都要六七十元一個餐,好尐嘅要過一百元添呀! 我記得畢業後第一份工又係返中環,箇陣食個午餐都無恁貴噶! 都唔知點解,份人工越黎越唔見使,唉!

講返我平時嘅工作,主要都係照顧公司幾位老闆,渠地出差時,幫渠地訂下機票、酒店,或者幫渠地處理下尐私人事務啦。有時老闆話要召集幾個offices嘅同事黎香港開會,咪要去搵酒店會議室格價、安排尐同事來港住宿、幫渠地預訂會後的晚飯地點等等。另外,我要處理公司嘅 「行政」事務,好聽就叫行政,唔好聽咪叫打雜囉。即是要搵人定期維修影印機、咖啡機、睇住清潔office尐阿姐、公司梳化 (server) 有事,要搵總部箇邊同事幫手解決,如果係軟件問題,就call 幫公司搞IT間公司嘅人上黎,重有果尐寄速遞呀、office 植物叫人黎淋水呀等等啦。

其實,我最怕係尐機器出事,平時無特別事,壞咗咪搵人黎維修囉,我最怕係有 event 箇陣,要彩色影印時無晒碳粉,或者部影印機突然 「跪低」,唔係講笑噶,上次開大會,尐同事黎到香港office 先密密改尐 powerpoint,要等渠地改好先畀個檔案我印,有個同事個檔案有成百幾張slide,結果開會之前果日,我、同事S、同事E,再加埋司機哥哥,先至搞得掂,事關印完要分,分完又要打孔,之後先至入落去個binder file,要執到靚靚仔仔開會,因為總部幾個高層都有份開會,要打醒十二分精神囉。箇晚係由下午做到夜晚十點,結果都未整完,要第二朝一早返公司搞埋手尾…… 箇晚本來要去中學老師的喪禮,因為要OT,始終唔能夠出席,嗚! 希望老師唔會怪我啦。

本文刊登《輔仁媒體》 2013年8月21日

Advertisements

About Eternity of words

在抒情和抗爭之間遊走。 曾獲香港青年文學獎小說獎,以筆名「心頁」創作新詩,作品散見於《香港文學 》、《秋螢詩刊》(復活號)、《詩++》及《聲韻詩刊》 等。 著有詩集《中女情懷總是詩》 及《抒情的抗爭》。
This entry was posted in 中環OL 獨白 and tagged . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s